nga – Tea Meço
Si t’ja shpjegoj gjyshit, të cilit komunizmi i rrënoi jetën, që demokracia e kapitalizmi i ka tollonët e bukës për turp?
Lindur në ‘34, pa gjermanët që i dogjën dy herë shtëpinë, pa monizmin që i mori toka, florinj e prona, i mori të afërm e ja vrau nëpër burgje dhe kur mendoi që me pluralizmin do shihte dritë, pa vetëm fatura energjie elektrike të shtrenjtuara.
Për pensionistët mendon shteti dhe nga taksat e kripura që paguajnë qytetarët atij i takon plot 12.895 lekë pension pleqërie, me ca bonuse, 1.000 dhe 690 lekë, arrin një total 14.585 lekë.
Ama faturat duhen paguar, drita e ujë shkojnë rreth 6.500 në muaj. Edhe këtu ka menduar shteti, i jep plot 848 lekë kompensim, pra nga xhepi duhet të fusë vetëm 5.652 lekë.
Po dhe ilaçe duhet të pijë e falë Zotit ka pak patologji, por nuk ja subvencionon shteti dhe rreth 3.000 lekë në muaj i lë në farmaci.
Pra na mbeten 5.933 lekë për të ngrënë bukë. Por edhe për këtë ka menduar shteti, se na nxorri pasqyrën e çmimeve: 170 lekë një litër vaj luledielli, 119 lekë një litër qumësht, 525 lekë një kg gjalpë, 359 lekë një pulë e therrur, kilogrami i mollëve shkon nga 89 në 370 lekë, varet se sa hormone i kanë dhënë pemës.
Pra matematika është e thjeshtë dhe nuk është opinion.
Buxhet, përfshirë veshmbathje por e zëmë se s’do të vishet, përfshirë transport por e zëmë se s’do të dalë nga shtëpia, i mbeten plot 197,77 lekë në ditë, për çdo ditë të muajit.
Po mirë është gjyshi, një kokërr vezë e një gotë qumësht në ditë ja del ta blejë. Nga ato të modifikuarat gjenetikisht mund të marrë edhe ndonjë kokërr mollë. Mos e dhëntë Zoti të ketë neps për ndonjë kofshë pule, se duhet të mblidhen fëmijët ta ndihmojnë, por për fat ka 5 fëmijë e ka raste e ha edhe një copë mish.
Moshatarëve të vet që kanë vetem një fëmijë a dy, u mbetet vetëm të dalin para pasqyres e të thonë “pasqyrë moj pasqyrë, shyqyr kemi kaq, se jashtë vendit bota vdes rrugëve”
PS: për të patur shifrat e sakta i thashe “pyetje teknike, sa lekë pension merr?” më tha “kjo s’është pyetje teknike, është pyetje jetike”
