Kryeministri Edi Rama doli sot, 21 tetor, me paketën e tij më të re të “masave të ashpra”. Në një takim me drejtuesit e sistemit bankar, ai paralajmëroi se protestuesit e dhunshëm do të futen në një regjistër dhe se “do t’u mbyllim shumë aksese nëpër aeroporte, hotele, trena… të gjitha mjetet e transportit”.

Për familjet tha: “Do të vijë fatura në familje, do të paguajë familja.” Shtoi edhe se qeveria “e ka nisur punën me vendet e BE-së” që këtyre të rinjve t’u ndalohet hyrja në Europë.

Kërcënimi është i frikshëm. Ka vetëm një problem të vogël teknik: treni.

Ndalim hyrjeje në një tren që s’ekziston

Stacioni hekurudhor i Tiranës u shemb në vitin 2013. Kryeqyteti i një vendi kandidat për në BE ka mbetur pa tren që atëherë. Kësaj i thonë ndoshta reforma më e suksesshme e qeverisjes: s’ka tren, s’ka vonesë.