🇬🇧 Read this article in English →

Pas 137 ditësh protestë, dhune, përplasjesh dhe një rinie që kërkon të dëgjohet, Presidenti i Republikës, Bajram Begaj, ka reaguar më në fund.

Po, po, Shqipëria ka President! Dhe jo vetëm kaq: Presidenti qenka edhe i gatshëm të dëgjojë shqetësimet e qytetarëve.

Lajmi mbërriti sot, ndërsa studentët përballeshin me policinë dhe tensionet në rrugët e Tiranës. Kreu i shtetit kujtoi se protesta paqësore është themel i demokracisë dhe se policia duhet të veprojë brenda kufijve të ligjit.

137 ditë protestë për t’u vënë re. Duket se kaq iu desh institucionit më të lartë të shtetit për të zbuluar se qytetarët kanë shqetësime dhe se Kushtetuta nuk është thjesht një libër për ceremoni zyrtare.

Presidenti deklaron se zyra e tij është e hapur për çdo të ri dhe qytetar që dëshiron të dialogojë.

Sa mirë! Tani mbetet vetëm një pyetje e vogël: nëse zyra është e hapur, ku ka qenë Presidenti gjithë këto ditë?

Në një vend ku qytetarët presin reagim institucional, Presidenca na ofron gatishmëri për të dëgjuar. Në një kohë kur të rinjtë dalin në rrugë për të kërkuar ndryshim, institucioni më i lartë na kujton se ekziston.

Të paktën sot kemi një lajm pozitiv: Shqipëria ka President. Për reagimin e radhës, shpresojmë të mos na duhet të presim edhe 137 ditë të tjera.

Pas Perdes — sepse ndonjëherë lajmi më i madh është ai që duhej të ishte dhënë shumë kohë më parë.