Tiranë, 21 tetor 2026 – Përfaqësuesi i OSBE-së për Lirinë e Medias ka dalë me një reagim të fortë për raportimet e vazhdueshme të dhunës dhe pengimit të gazetarëve që mbulojnë protestat antiqeveritare në Shqipëri. Në një deklaratë zyrtare, OSBE i quan këto raportime shqetësuese dhe u bën thirrje autoriteteve shqiptare të hetojnë me shpejtësi dhe efektivitet të gjitha incidentet, përfshirë pretendimet për përdorim të tepruar ose joproporcional të forcës nga policia.

Ky është një sinjal i qartë nga ndërkombëtarët: ajo që po ndodh në rrugët e Tiranës nuk po kalon pa u vënë re. Ndërsa studentët, pedagogët dhe qytetarët marshojnë drejt Kryeministrisë duke kërkuar dorëheqjen e Edi Ramës, gazetarët që i transmetojnë këto ngjarje në kohë reale po raportojnë se janë bërë objekt dhune dhe pengimi.

OSBE kujton se liria e medias dhe e drejta e publikut për t’u informuar janë themele të çdo demokracie funksionale, dhe se gazetarët duhet të mund të punojnë lirshëm, të sigurt dhe pa ndërhyrje edhe gjatë demonstratave. Organizata i referohet Vendimit nr. 3/18 të Këshillit të Ministrave të OSBE-së, me të cilin Shqipëria, si shtet pjesëmarrës, është angazhuar të mbrojë gazetarët dhe të garantojë llogaridhënie për sulmet ndaj tyre.

Më tej, OSBE kërkon që policia të zbatojë plotësisht udhëzimet ekzistuese të Policisë së Shtetit për Sigurinë e Gazetarëve, duke lehtësuar, e jo penguar, raportimin gjatë tubimeve publike.

Pyetja që qeveria duhet t’u përgjigjet shqiptarëve: nëse policia ekziston për të mbrojtur qytetarët, pse po raportohen gazetarë të goditur dhe të penguar teksa dokumentojnë protestën? Një qeveri që s’ka çfarë të fshehë nuk i trembet kamerës.

Thirrja e OSBE-së vjen në ditët kur edhe zëra të tjerë evropianë po ngrenë shqetësime për të drejtën e qytetarëve për të protestuar. Presioni ndërkombëtar po rritet. Tani radha është e institucioneve shqiptare: hetim i plotë, emra dhe përgjegjësi, jo heshtje.